Chillida-Leku museoak aldi baterako lan erregulazio espedientea (ERE) izapidetzeko eskaria egin du, eta 2011ko urtarrilaren 1etik ateak ixtea erabaki du. Erabaki horren oinarrian defizit iraunkorra dago; izan ere, obra artistikoei eskainitako museo guztiek bezala, defizit iraunkorra du Chillida-Leku museoak ere, eta egoera hori are gehiago larritu da krisi ekonomiko orokorraren ondorioz. Defizitak nabarmen egin du gora, eta ezinezkoa da ekimen pribatuaren bidez kopuru horiei eustea.

Chillida-Leku museoak 2000. urtean zabaldu zituen ateak, 17 urteko eraikuntza lanak amaituta. Harrezkero, 810.000 bisitari erakarri ditu, eta Gipuzkoako arte museo nagusia da, bisitari kopuruari dagokionez; era berean, Euskadiko lau museo nagusietako bat ere bada, bisitari kopuruagatik ez ezik, aldian-aldian egindako inkestetan balioespenari buruz bildutako datuengatik ere. Hori guztia kontuan hartuta, antolatzaileek eskerrik beroenak eman nahi dizkiete urte hauetan Chillida-Leku bisitatzera etorritako guztiei.

Aurrerantzean, publikoarentzat ateak itxita izango dituen arren, museoak lanean jarraituko du: museoaren jarduerari atxikitako ekintza paraleloei eutsiko die, hala nola ondare artistikoaren kontserbazioari eta erakusketa nazional nahiz nazioartekoei, besteak beste.

Museoak nabarmendu nahi du erabateko borondatea duela akordioa lortzeko, betiere museoaren sortzaileek jatorrian definitutako moduan aurrera jarraitzeko ezinbesteko baldintzak bermatzeari begira.